ENTROIDO 2026

O pasado venres, 20 de febreiro, fixemos o desfile temático de disfraces cociñeiros relacionados co PDI 2025/2026: "Salpimenta o teu maxín".

Todo o evento foi gravado por auténticos reporteiros do Canal Tambo e tivemos incluso vendedores de aperitivos no graderío.

Demos unha volta pola contorna do Carballal para que puideran vernos as familias e logo continuamos no patio ao ritmo de "Exceso no meu prato".

Todos os disfraces foros excepcionais pois... había un xurado ben esixente!!!

O alumnado de Educación Infantil disfrazouse de froitas (uvas, sandías, fresas e kiwis), peixes e hortalizas (cenorias, brócoli e millo).

En primeiro foron do conto da cigarra e a formiga.

En segundo fixeron flocos de millo.

No segundo ciclo fixeron unha festa gastronómica con comidas típicas da nosa vila: sardiñas do xeito, cigalas, chourizos e empanadas.

Non houbo perigo de intoxicación porque estivo supervisada por un inspector de sanidade.

En quinto sorprendéronnos con cigarróns, madamas, galáns, pantallas, peliqueiros... e moitas receitas típicas do Entroido: filloas, orellas, flores, rosquillas, etc.

O alumnado de 6º disfrazouse por última vez neste colexio de forma doce: pasteleiros (PASTE - LERIAS).

Por outra banda, durante a semana, tivemos dúas sesións do programa "Lectura e Familias" na biblioteca destinadas aos nenos de 1º e 4º de Educación Primaria que nos encantaron.

Bo Entroido a todos/as!!!

DESFILE LIBRE DE ENTROIDO - TORNEO DE XADREZ - CANCIÓN DO ENTROIDO 2026 - ADIÓS RÍOS

Esta semana cumprimos co mandadiño tal e como podedes observar nas instantáneas.

O venres, logo dunhas merendolas con doces típicos e como colofón, tivemos un desfile de disfrace libre no ximnasio onde había auténticas marabillas e glamour.

Pola tardiña foi a festa organizada pola ANPA "Viñas Blancas" e houbo moita afluencia de xente.

Aprendemos tamén a canción de Entroido deste ano: "Exceso no meu prato".

Aquí tedes o seu karaoke para que poidades practicar.

Aquí podedes visualizar algúns Entroidos doutros cursos... e lembrade que o venres que vén será o desfile temático relacionado co PDI "Salpimenta o teu maxín".

Por outra banda, o mércores gozamos durante a mañá cun torneo de xadrez entre alumnado de diferentes niveis no marco dos Polos Creativos.

Contamos con material emprestado pola Escola Xadrez Pontevedra á que queremos dar as grazas.

Mirade que agasallos máis chulos para os finalistas e gañadores!!!

Para rematar, deixamos as cancións que interpretaremos este ano no Día de Rosalía que celebraremos o vindeiro venres, 6 de marzo, xunto co Día da Muller.

Este ano incluímos "Adiós ríos" (música de Amancio Prada).

Boas minivacacións, tambeiros/as... e non esquezades ir ao Enterro da Sardiña!!!

MANDADIÑO COCIÑEIRO 2026 - "EXCESO NO MEU PRATO"

Boas tambeiros/as!!!

Por mor da meteoroloxía adversa, queda adiado o desfile de Entroido do vindeiro venres para o 20 de febreiro.

Teremos unha semana (do 9 ao 13 de febreiro) igualmente anegada de espíritu carnavaleiro co "Mandadiño Cociñeiro" que argallou o Equipo de Actividades Complementarias e Extraescolares:

1. Se o luns no cole queres entrar, un fermoso mandil debes levar.

2. O martes, se cociñeiro queres ser, a cabeza cuberta has de traer.

3. O mércores, para o mellor cheff parecer, un pano de cociña tes que coller.

4. O xoves despois de almorzar, co pixama imos estudar.

5. O venres ao final, todos xuntos imos merendar, cadaquén co seu disfraz!!!

Por outra banda, o alumnado de 6ºB de Educación Primaria tivo unha actividade na cociña e gozamos moito nos Polos Creativos da Semana no recuncho de Tambo.

Para rematar, o alumnado de 4º de Educación Primaria, na materia de Proxecto Competencial, vén de rematar unha canción para o desfile de disfraces grupais relacionados co PDI anual: "Exceso no meu prato" (versión de "Espresso Macchiato")... e agardamos que nela notedes que están todos incluídos.

Aquí tedes a letra e en breve poderemos escoitar a gravación coas súas voces!!!

DÍA DA PAZ 2026 - ANO CASTELAO - ACTIVIDADES NA COCIÑA

O pasado venres, 30 de xaneiro, celebramos o "Día Escolar da Non Violencia e a Paz" e o 140 aniversario do nacemento de Castelao no Carballal.

Elaboramos unha chea de receitas anegadas de amor en cada aula e pendurámolas nun dos andares do cole, como proposta do Equipo de Actividades Complementarias e Extraescolares.

Logo da lectura dun manifesto pacífico ben soboroso por parte de Carlota e Noa (6º de Educación Primaria), tamén cantamos todos xuntos ao vivo, no ximnasio, a canción "Cociña paz" (versión de "Time after time" de Cyndi Lauper), elaborada polo alumnado de 5º de Educación Primaria na materia de Proxecto Competencial.

Aínda que con algo de retraso, celebramos o Ano Castelao (2025) coa representación dunha adaptación dun anaco da súa obra teatral máis chula: "Os vellos non deben de namorarse".

En breve, gravarémola en vídeo para enviar ao Salón do Libro de Pontevedra deste 2026.

Desenvolveuse na biblioteca en tres pases diferenciados por franxas de idade e encantounos o atrezo minimalista, o vestiario e o cartaz publicitario con reproducións de ilustracións do libro orixinal feitas pola profa Rosa.

Os actores e actrices foron nenos e nenas de 5º e 6º de Educación Primaria aos que queremos dar os nosos parabéns polo éxito e porque... traballaron arreo durante moitos recreos coa profa Chus!!!

Ao finalizar, uns solistas (Diana, Amín, Leia, Izhar e Álex), cantaron a canción "Lela" e puidemos acompañalos no retrouso pois, aparece nesa obra de teatro!!!

Para rematar, tivemos dúas actividades de cociña durante a semana enmarcadas no programa "Lectura e Familias".

O alumnado de Educación Infantil gozou con contos e a elaboración de comida saudable cos pais de Lucas e David.

A madrastra de Martín presentou para o alumnado de 1º de Educación Primaria o libro: "Imos facer unha torta".

Trouxo tamén unha chea de actividades divertidas relacionadas coa cociña.

E... o alumnado de 6º de Educación Primaria fixo unhas madalenas que estaban ben ricas!!!

Boa finde, tambeiros/as!!!

LECTURA E FAMILIAS - SAÍDA AO MESTRE LANDÍN - COIDA O TEU LOMBO

Esta semana tivemos moito contacto co IES "Mestre Landín" pois é o noso centro adscrito.

A rapazada de 6º de Educación Primaria puido coñecelo de dúas formas: in situ, o xoves; e por medio dunha reunión dos seus profesores, o martes pola tarde na biblioteca.

Os nenos e nenas de 3º e 6º de Primaria, aprendemos tamén a coidar a saúde do noso lombo grazas a Fátima que, como todos os anos, acudiu ao cole para concienciarnos... xa sabedes: menos prato e máis zapato!!!

A actividade máis destacada foi a primeira sesión deste curso do programa "Lectura e Familias".

Foi na biblioteca e nela gozou todo o alumnado de Educación Infantil.

A nai de Xulia acudiu o xoves coa súa amiga Laura para presentarnos o seu primeiro libro infantil: "Elefante y Tigre".

Agasallounos con pegatinas que nos encantaron... grazas pola visita!!!

Nos polos creativos da semana tivemos moita construción e lettering.

Mirade que chulada!!!

Boa fin de semana!!!

Agardamos que ensaiedes moito a canción "Cociña Paz" para o vindeiro venres, tambeiros!!!