Xa temos gañadores do "Concurso de Novas" que nos propuxo o Equipo de Dinamización da Lingua Galega no 1º trimestre.
Trátase dunha mestura de ideas que aparecen nas novas que foron presentadas e que o alumnado de 4º de Educación Primaria, na materia de Audiovisuais, adaptou para facer unha versión audiovisual.
A finais de curso, teremos un videoclip (versionando unha canción de 1973) de esta divertida historia na que quizais recoñezades algo da nova que entregastes.
Aquí a tedes tambeiros/as!
---------------------------------------------------------
Efemérides: “O Teixugho”
O exalumno do Carballal, Mario Viñas, recibe un recoñecemento honorífico
No tardiña de onte, celebrouse unha xuntanza ben importante no Colexio Carballal de Marín, onde os membros do profesorado decidiron, por unanimidade, outorgar o título de “O máis traste en 50 anos” a Mario Viñas Blancas, alias “O Teixugho”, por ser o alumno máis zarapelo dende que se creou o centro.
Lembraron que durante un recreo do curso 1987/88, logo de mercar un bocadillo de mortadela na ANPA, Mario adoptou un cambio radical na súa actitude, pasando de ser un neno exemplar en canto a comportamento, a ser un auténtico terror…
Que levaría a mortadela daquela merenda?
Certo día, colocou chinchetas ben afiadas na cadeira na que debía sentarse o inspector, que viñera facer unha revisión das programacións con Don Gonzalo, o director naquel momento…
Só sabemos que non voltou xamais, nin el nin ningún dos seus sucesores, e contounos un paxaro, que dende aquela mañá de febreiro, leva pendurado no seu traseiro un mural de Entroido que argallaron os nenos de Educación Infantil.
Noutra ocasión, deixou un rato de goma no caixón da mesa do mestre de Música, a sabendas de que este lle tiña moitísimo noxo aos roedores. Cando o mestre foi coller un lapis e mirou aquilo, dou tal chimpo que estivo a piques de vomitar.
Tamén recordaron aquel día de decembro no que foi recollendo panos de mocos ben verdes de toda a rapazada con catarro, para esparcilos polas fechaduras exteriores.
Aquel líquido colleu tal consistencia, que os cerralleiros estiveron dúas semanas tentando abrir as portas con taladros e percutores, tempo no que non houbo clase, converténdose así el, en todo un líder do Carballal.
Pensaron incluso en poñer un día dedicado á súa persoa!
Os mestres, foron enumerando, unha a unha, todas as súas falcatruadas e botaron horas ata chegar á fin, pois eran milleiros!
Clases enteiras quedaban sen excursión ou sen recreo polas trasnadas do Teixugho e, o derradeiro día daquel curso, todos os afectados, reuníronse para darlle un bo escarmento. Meteron laxante na súa botella de auga para que collera unha boa cagalera e quitaron o papel hixiénico do váter. Mario foi beber durante a clase de Educación Física na que estaban a xogar ao brilé. Cando aquela porcallada lle fixo mal no bandullo, correu coma un tolo ao váter máis cercano para sentarse e facer as súas necesidades.
Alí botou máis de dúas horas e rematou esgotado…
Cando se quixo levantar para ir á Aula de Inglés, decatouse de que non había papel por ningures e saiu ao patio cos pantalóns polos nocellos causando a risa dos seus compañeiros!!!
Dende aquel día, Mario non volveu facer ningunha trasnada… así que xa sabedes, mirade ben o que leva o voso bocata dos recreos, porque algúns, teñen premio!
Canal Tambo Noticias
----------------------------------------------------------------------------------
Por outra banda, deixamos unhas instantáneas moi graciosas.
 |
| CleoPatri |
 |
| Tambo |
Corresponden ao Mandadiño destes días, no que houbo que traen algo na cachola, no pescozo, pixama e calzado desparellado.Mañá venres, deberemos vir co noso disfraz de grupo para o desfile!
E non esquezades practicar a canción que interpretaremos no Día de Rosalía (23 de febreiro) que no colexio celebraremos o vindeiro venres 24, na volta das mini-vacacións.
Aquí tedes un ensaio con algunhas das colaboradoras da biblioteca.
