FESTIVAL DE FIN DE CURSO 2023 - GRADUACIÓNS - OUTRAS NOVAS

Este ano dedicamos un PDI ben completo ao noso colexio polo seu 50 aniversario, o que fixo que fora un curso moi intenso e emocionante.

Chegamos á recta final e agora toca descansar para comezar un novo reto en setembro.

Nesta derradeira semana tivemos algunhas actividades interesantes no Carballal.

O alumnado de 3ºA de Primaria mostrou unha serie de máquinas sinxelas que fixeron na aula ao resto do colexio.

O alumnado de 2ºA de Educación Primaria entregou o seu produto final sobre investigación de xogos tradicionais dos anos 70 que comprimiron neste vídeo.

Tiveron tamén unha actividade de fin de curso artellada polo Equipo de Dinamización da Lingua Galega e interciclo.

Consistiu na búsqueda dun tesouro e estivo relacionada coa confección de rimas, adiviñas e trabalinguas en galego.

O final do xogo levábanos a unha palabra que de seguro coñecedes: "Carballal".

Os nenos e nenas de 3º de Educación Primaria tamén entregaron un fermoso traballo relacionado co PDI argallado na Sección Bilingüe de Plástica en Inglés.

Consiste nun vídeo no que describen o Carballal nos anos 70 e no que artellaron uns debuxos ben chulos.

A rapazada de 6º de Educación Infantil visitou as aulas de 1º de Primaria que ocuparán o ano que vén.

Nesta visita fixeron unhas coroas moi fermosas.

O martes, 20 de xuño, á tardiña, foron as graduacións de Infantil e Primaria e nela, os nenos/as que deixan o noso cole para comezar unha nova etapa no instituto, dixeron unhas fermosas verbas...

Nela proxectáronse algúns vídeos emotivos.

O mércores, 21 de xuño, celebramos o Festival de Fin de Curso pola mañá e con el... despedímonos!!!

Houbo moitas coreografías baseadas en cancións das cinco décadas que leva de percorrido o noso centro, como a que fixeron os nenos/as de 5ºA de Educación Primaria sobre o mix que aparece no vídeo.

O remate entregamos os diplomas aos axudantes da biblioteca que fixeron que funcionase á perfección durante o curso.

Tamén entregamos un agasallo a Bety, que logo de 15 anos no colexio, deixa o Comedor Escolar... agardamos que che vaia ben!!!

Aquí tedes o vídeo-resumo do Festival e das Graduacións... que pasedes un bo verán!!!

HOMENAXE A FINA CASALDERREY - PROGRAMA PHOENIX - FESTA DA ANPA - GALA VIDEOGHIT - VISITA DA GALIÑA AZUL - INTERCAMBIO DE LIBROS USADOS - XOGOS DE MESA - ACTIVIDADE CO MESTRE LANDÍN - CINE EN GALEGO

O pasado sábado, 10 de xuño, a escritora e madriña da nosa biblioteca escolar, Fina Casalderrey, recibiu unha grande homenaxe en Pontevedra por parte da Asociación de Escritores e Escritoras en Lingua Galega.

Trátase da mención "Escritora na súa Terra", na que lle concederon a letra E.

Queremos darlle, dende o Carballal, os nosos parabéns!!!

Durante a mañá do martes, 13 de xuño, tivemos unha charla no ximnasio por parte do atleta Víctor Riobó sobre o Proxecto Phoenix, destinado á materia de Educación Física e relacionado coa resistencia física, a habilidade, etc.

Estivo destinada ao alumnado de Educación Primaria e tamén tivo a súa parte práctica no exterior.

Esta iniciativa, creada pola Fundación Phoenix (Polonia) á que pertence Javier Gómez Noya, pretende fomentar a actividade física na rapazada.

O mércores, 14 de xuño, recibimos unha visita en Educación Infantil do alumnado da Galiña Azul na que o pasamos realmente xenial!

Démoslle un pompeiro como agasallo e merendamos todos/as xuntos/as no patio.

Esa mesma mañá, o alumnado de 5º e 6º de Educación primaria, tivo unha sesión sobre xogos de mesa na biblioteca.

Impartiuna a empresa "Corvus Belli".

O xoves, 15 de xuño, o alumnado de 5º de Educación Primaria tivo unha actividade común coa rapazada do IES "Mestre Landín" que xa fixemos o pasado curso.

Argallaron pontes con grande resistencia a partires de material moi fino de madeira.

Á tardiña, a ANPA "Viñas Blancas" celebrou a súa tradicional "Festa de Fin de Curso" na que se achegaron tamén Donald e Mario Bros.

Houbo: un palomitero, inchables secos e de auga e un toro mecánico.

Nesa mesma xornada foi a Gala de Entrega de Galardóns dos premios "Videoghit" nos que tiñamos varios vídeos finalistas.

Foi no IES "Pintor Colmeiro" de Silleda e acudiu un representante do colexio.

Levamos o premio ao mellor guión con "Heroes enmascarados", argallado polo alumnado que hoxe cursa 6º de Educación Primaria e inventado por Hugo Cao (4º de Educación Primaria).

O mellor Videoghit 2023 levouno "Cántiga", do IES "Chan do Monte" de Marín.

E o mellor Videoghit de Infantil e Primaria foi para "O cole que mola" de Cea.

Nas mañás do xoves 15, venres 16 e martes 20 de xuño, houbo unha serie de proxeccións no ximnasio, por quendas de idade, dunha película acompañada por flocos de maíz.

O público foi todo o alumnado que cubriu o seu cartón da actividade "12 días en galego", proposta polo EDLG e que fomenta o emprego do galego.

Para rematar, o pasado sábado, 17 de xuño, pola mañá, celebrouse na Alameda de Marín a "Feira do Libro Usado", organizada polos colexios de Seixo e Ardán e que conta coa colaboración do resto de centros do municipio e do Concello de Marín.

O alumnado trouxo libros usados ao colexio e recibiu un bono por cada un deles, que puido canxear nesa xornada por outro libro usado.