Hoxe chegou ao recuncho de Tambo unha das novidades agardadas, pois tardou un pouco de máis en saír do prelo: "Un día con Papá" (Edicións Embora).
 |
| CD de "Un día con papá" (Edicións Embora) |
Trátase do libro-disco infantil en galego da nosa madriña, Fina Casalderrey, e do mestre de Educación Musical, Víctor Castro.
Con esta lectura poderedes mergullar na fermosa historia de Xela e o seu pai (Anxo) ao longo de dez capítulos ilustrados por Paula Andrade (Premio Extraordinario en Artes Plásticas e Diseño da Xunta de Galicia).
Se vos fixades ben, poderedes atopar a Tambo agochado en cada unha delas... probade porque é ben divertido!
Con cada un deses capítulos, ofrécesevos un poema (en moitas ocasións imaxinario), unha canción (no CD que se achega) e unha animación de vídeo con karaoke á que podedes acceder apuntando ao código QR do libro ou ben premendo na seguinte imaxe:
Nestes momentos está a primeira delas ("Cantamos?"), pero a partir do domingo, 6 de febreiro, estrearáse unha nova cada semana... así que xa podedes subscribirvos para estar ao día.
O libro-disco, atópase no andel específico da biblioteca da nosa madriña e está dedicado a todo o alumnado do cole.
Por se alguén quere mercalo, xa está dispoñible ou ben pódese encargar en calquera libraría da nosa vila (Nobel, Maky, Jumer, D'cores ou Bule Bule) ou na web da distribuidora (Consorcio Editorial Galego):
Cando sexa posible, faremos unha presentación no cole con algo de música en directo, na que procuraremos convidar aos colaboradores do disco: Ángela Castro, Montse Ogando, Miguel Túñez, Diana Tarín, Ricardo López, Marta Valbuena, Juan Froján, Miguel Froján, Pablo Mata, Olga Brañas, Alejandro Pazó e Elvira Martínez.
Dous deles xa finaron hai uns anos: Miguel Guerra e o poeta EV.CALO.
Aquí tedes un podcast do programa "A ventana de Pontevedra" de RadioPontevedra (Cadena SER) no que os autores falaron un chisco deste traballo:
Agardamos que vos guste tambeiros/as... e de seguro que, pola súa temática, este libro-disco vai aportar moito ao PDI deste curso: "Mergullo nas Rías".
