REFORESTANDO O MONTE PITUCO - VISITA DA GALIÑA AZUL

Esta semana, aínda que curtiña, estivo marcada por dúas actividades ben interesantes o pasado luns, 16 de marzo, no Carballal.

Os nenos e nenas de 3º de Educación Primaria saíron ao Monte Pituco con persoal da Comunidade de Montes.

Fixeron unha reforestación de árbores queimadas nos incendios e coñeceron os petróglifos cercanos ao Mirador do Pornedo.

Aquí tedes a noticia completa!!!

Por outra banda e para rematar, o alumnado de Educación Infantil recibiu aos nenos e nenas da Galiña Azul que viñeron a coñecer as Viñas Blancas e a facer un obradoiro de cociña.

SALÓN DO LIBRO 2026 - SAÍDA Á GALIÑA AZUL - BISCOITOS DE CABAZA E PIZZA - SAÚDE BUCODENTAL

O pasado martes, 10 de marzo, o alumnado de 5º e 6º de Educación Primaria acudiu ao Salón do Libro Infantil e Xuvenil de Pontevedra.

Recibiunos Órbil (a súa mascota) como sempre na entrada e demos unha voltiña polo recinto visitando todos os stands.

Este ano, a temática xira a carón da música e nós colaboramos coa gravación en vídeo da obra de teatro "Os vellos non deben de namorarse" e a canción "Lela".

Puidemos mirala proxectada nunha pantalla.

Gozamos tamén cun espectáculo do Mago Paco e incluso participamos nel...

Esa mesma mañá, o alumnado de 6º de Educación Infantil foi á Galiña Azul.

Alí interpretaron a obra de teatro que están a traballar na aula.

Por outra banda, os nenos e nenas de 1º de Educación Primaria, tiveron unha actividade na cociña enmarcada no programa "Lectura e Familias" cos pais de Ian Guerrero.

Foi o xoves, 12 de marzo, e cociñaron uns exquisitos biscoitos de cabaza e pizza.

Para rematar, os nenos e nenas de 1º e 3º de Educación Primaria tiveron unha sesión formativa de saúde bucodental na biblioteca o venres, 13 de marzo, na que recibiron un cepillo e un diploma.

8M ROSALIANO - ACTIVIDADE DO CIM - O COMEDOR DA AVOA - COCIÑANDO ROSQUILLAS E PIZZA - ENCONTROS PLAMBE E RADIO

O pasado venres, 6 de marzo, celebramos no cole o Día Internacional da Muller e o Día de Rosalía cunha chea de actividades.

Puxemos un cartaz cociñeiro enorme nun dos andares titulado: "As nosas chef con estrela".

Nel aparecían mulleres exemplares da nosa vida coa súa receita favorita.

Tamén tivemos un recital poético en tres pases a carón de Rosalía De Castro con representantes de cada nivel e do profesorado que se centrou no seu poema: "Miña casiña, meu lar" (do libro "Follas Novas").

Nel, Rosalía fai un "Caldo de gloria", na ola onde depositamos os poemas.

Foi na biblioteca e ao final abraiáronnos cunha sorpresa máxica quitada da pota: un bolo do pote!!!

Cantamos tamén tres cancións ben chulis coa axuda da profa Natalia que todos/as coñecedes e escoitamos a 3 Rosalías pronunciar un dos seus manifestos feministas.

Esa mesma mañá, o alumnado de 6ºA de Educación Primaria, tivo unha actividade na cociña na que fixeron pizza romana.

O luns, 2 de marzo, o alumnado de 5º e 6º de Educación Primaria tivo unha charla na biblioteca do CIM do Concello de Marín.

Pilar, faloulles do SAF (Servicio de Axuda no Fogar) que está totalmente feminizado.

O xoves, 5 de marzo, o alumnado de 2º de Primaria fixo rosquillas na cociña coas nais de: Sara, Samara, Emma e Enzo.

A actividade estivo enmarcada no programa "Lectura e Familias".

Por outra banda, o alumnado de 3º e 4º de Educación Primaria tivo unha saída didáctica anegada de teatro a Afundación.

A obra estivo relacionada co PDI anual, tal e como podedes comprobar no título: "O comedor da avoa".

Para rematar, a coordinadora do recuncho de Tambo (profa Chus), a nosa biblioteca, acudiu aos encontros PLAMBE que se celebraron en Compostela.

Ah... e non esquezades botarlle unha escoita aos últimos programas de Tambo nas Ondas, tambeiros/as!!!

OBRADOIROS DE COCIÑA VEGANA + FILLOAS + CHULAS - DÍA DE ROSALÍA (POEMAS MUSICADOS) - DESPEDIDA DE MARIÑA

O pasado luns, 23 de febreiro, o alumnado de 5º de Educación Primaria tivo un Obradoiro de Receitas Veganas na cociña do cole que cada día colle máis forma: callos con setas, humus, biscoito de cacao, boliñas de cenoria e dátiles, paté de pemento-garavanzos-lentellas, etc.

Estivo enmarcado dentro do Programa "Lectura e Familias" e impartiuno María, filla de Charo (ex-mestra do Carballal) e curmá segunda de Emma Dopazo.

A verdade é que estaba todo boísimo e elaborouse con ingredientes ben sas... moitas grazas pola visita!!!

Nesa mesma data foi o "Día de Rosalía", pois hai 189 anos que naceu esta grandísima escritora das nosas letras (23 de febreiro de 1837).

Celebrarémolo xunto co "Día da Muller" (8 de marzo) o vindeiro venres, 6 de marzo.

Aquí tedes os 3 poemas musicados que interpretaremos ao vivo: "Tecín soia a miña tea", "A Rosalía" e "Adiós ríos".

Por outra banda, o alumnado de 6ºB de Educación Primaria gozou o venres con outro obradoiro de cociña da man de Alicia, nai de Emma, no que aprenderon a facer chulas e filloas.

O martes tamén recibimos a algunhas familias que viñeron a coñecer o Carballal na segunda e derradeira Xornada de Portas Abertas deste curso.

Para rematar, despedimos a Mariña (mestra en práticas en 5º de Educación Primaria) logo de estar con nós dende o mes de outubro... botarémola moitísimo de menos!!! 

ENTROIDO 2026

O pasado venres, 20 de febreiro, fixemos o desfile temático de disfraces cociñeiros relacionados co PDI 2025/2026: "Salpimenta o teu maxín".

Todo o evento foi gravado por auténticos reporteiros do Canal Tambo e tivemos incluso vendedores de aperitivos no graderío.

Demos unha volta pola contorna do Carballal para que puideran vernos as familias e logo continuamos no patio ao ritmo de "Exceso no meu prato".

Todos os disfraces foros excepcionais pois... había un xurado ben esixente!!!

O alumnado de Educación Infantil disfrazouse de froitas (uvas, sandías, fresas e kiwis), peixes e hortalizas (cenorias, brócoli e millo).

En primeiro foron do conto da cigarra e a formiga.

En segundo fixeron flocos de millo.

No segundo ciclo fixeron unha festa gastronómica con comidas típicas da nosa vila: sardiñas do xeito, cigalas, chourizos e empanadas.

Non houbo perigo de intoxicación porque estivo supervisada por un inspector de sanidade.

En quinto sorprendéronnos con cigarróns, madamas, galáns, pantallas, peliqueiros... e moitas receitas típicas do Entroido: filloas, orellas, flores, rosquillas, etc.

O alumnado de 6º disfrazouse por última vez neste colexio de forma doce: pasteleiros (PASTE - LERIAS).

Por outra banda, durante a semana, tivemos dúas sesións do programa "Lectura e Familias" na biblioteca destinadas aos nenos de 1º e 4º de Educación Primaria que nos encantaron.

Bo Entroido a todos/as!!!