Ola tambeiros/as!
Agardamos que pasárades un bo verán e cargásedes ben as pilas para comezar un novo curso, unha nova aventura.
No primeiro día (luns, 11 de setembro), mirastes que os mestres e mestras ían vestidos cunha indumentaria deportiva mentres soaba a música de "Rocky"... ocórresevos por que pode ser?
Dádelle voltas porque, de seguro, ten algo que ver co proxecto deste ano.
Durante os primeiros recreos, aproveitamos tamén para apañar castañas, pois os castiñeiros do Carballal están tan cargados coma sempre... e vai chegando o Magosto.
Lembrades este videoclip que argallamos hai uns anos?
O videoclip "Mario O Teixugho", argallado polo alumnado que agora cursa 5º de Educación Primaria, resultou finalista na Sección Escolas Galegas do Festival Internacional de Cine de Bueu xunto a outros catro traballos.
Máis información na seguinte ligazón: FicBueu
A gala de entrega de galardóns será o vindeiro sábado, 23 de setembro, e a ela acudirá o alumnado implicado con dous mestres... agardamos que teñan moita sorte!!!
Pola tardiña hai máis actividades ás que podedes asistir coas vosas familias.
