Estás no blog da Biblioteca e do EDLG do CEIP do Carballal de Marín. Son a tartaruga Tambo, a súa mascota. Agardo que pases un bo rato lendo as nosas lerias!
O pasado luns, 24 de abril, os nenos e nenas de Educación Infantil fixeron unha saída didáctica ben interesante relacionada coa Educación Ambiental.
Foron a "Apípolis", en Xeve, e comprobaron de primeira man a relación entre as abellas e os seres humanos.
Logo dunha visita pola exposición, entraron no apiario vestidos de apicultores.
Botaron toda a mañá e trouxeron un pouco de mel, galletas feitas por eles mesmos e incluso unha vela coa cera que alí atoparon.
O xoves, 27 de abril, tivemos unha sesión de animación á lectura por quendas de idade para os nenos de Educación Infantil, 1º, 2º, 3º e 4º de Educación Primaria, titulada "A xanela do maxín", enmarcada no mes do libro e materializada por cortesía do Consorcio Editorial.
A actividade desenvolveuse no recuncho de Tambo e tivo moito éxito.
Continuando co programa "Lectura e familias", tivemos dúas sesións.
A primeira foi o mércores, 26 de abril, coa nai de Daniela e Marco para o alumnado de 4º e 5º de Educación Infantil.
A segunda foi o venres, 28 de abril, coas nais de Mateo, Alazne e Adriel para os nenos de 1º e 2º de Educación Primaria e 6º de Educación Infantil.
Para rematar, deixamos un ensaio das coplas do Maio co alumnado de Educación Infantil como solista e o alumnado de 4º de Educación Primaria como coro.
O vindeiro domingo, 23 de abril, será o Día do Libro.
No Carballal, festexámolo durante todo o mes con moitas actividades de lectura, pero o pasado venres, 21 de abril, démoslle un toque especial.
Tivemos a sesión tradicional de "Apadriñamentos lectores", na que os nenos e nenas de 4º, 5º e 6º de Educación Primaria, leron contos ao resto do alumnado do colexio por pequenos grupos.
Os nenos de 1º de Educación Primaria, tamén gozaron dunha fantástica sesión de contacontos con papiroflexia co pai de Aalis, pertencente ao programa "Lectura e familias".
O libro a tratar foi: "El rey sin corona".
Podedes visualizar unha das súas sesións premendo na seguinte ligazón do Espazo Cultural "Bululú".
Para rematar a xornada, tivemos un obradoiro de máis de dúas horas co narrador de historias e mestre de dobraxe en películas de animación e documentais (Discovery Channel), Damián Alonso, aberto a toda a comunidade educativa.
A actividade tamén forma parte do programa "Lectura e familias" e nela, pasámolo en grande: contamos historias mudando e modulando a voz, coas pausas axeitadas, cambios de ton e ritmo e ata controlando a respiración.
Feliz Día do Libro tambeiros!!!
Logo de aprender o retrouso e a coreografía da peza que interpretaremos co gallo do Día das Letras Galegas, aquí tedes o videoclip completo.
Trátase da canción titulada "Don Paco", que narra, a grandes rasgos, a biografía do autor conmemorado este ano: Francisco Fernández del Riego.
Os nenos e nenas de 4º de Educación Primaria (Obradoiro de Audiovisuais), 6º (Valores) e os axudantes da biblioteca, idearon esta versión discotequeira de "Killing me softly with his song" que Roberta Frack fixo famosa en 1973, curso no que se fundou o noso colexio.
Os datos da letra, colléronnos do libro infantil "O legado silandeiro", de Héctor Cajaraville, publicado pola Editorial Xerais.
Podedes atopalo no recuncho de Tambo.
Este traballo audiovisual será presentado por videoconferencia nas Xornadas das Letras Galegas que organiza o CAFI, o xoves 27 de abril entre as 20:15 e as 20:30, nas que se expoñen experiencias dos centros educativos dende os Equipos de Dinamización da Lingua Galega.
Estamos moi ledos por continuar a tradición de instrumentar aos homenaxeados dende hai 9 anos.
Agardamos que sexa do voso agrado, tambeiros... e que a aprendades para celebrar estes 50 anos espallando galego!!!
