ENTROIDO 2022

O pasado venres, 25 de febreiro, celebramos o Entroido no Carballal.

Papamos filloas, orellas e chocolate que nos preparou a ANPA "Viñas Blancas", á que, coma sempre, lle estamos moi agradecidos.

Tivemos sesión de baile e como non, desfilamos arredor da illa de Tambo seguindo o ritmo da canción que argallamos para a ocasión, interpretada por Alba Ramallo e Clara Pintos de 4º de Educación Primaria ("LimpouMo": unha parodia moi mariñeira do "SloMo", de Chanel, que irá a Eurovisión).

Os disfraces estiveron relacionados co PDI deste curso: "Mergullo nas Rías".

Aquí tedes as fotos de grupo:

-Educación Infantil: polbos, caranguexos e mexillóns.

-1º e 2º de Educación Primaria: fondo mariño.

-3º de Educación Primaria: peixes.

-4º de Educación Primaria: conservas.

-5º de Educación Primaria: "embarcados polas rías".

-6º de Educación Primaria: "polo mar".

E aquí está o vídeo-resumo da xornada.

Boas mini-vacacións tambeiros/as!!!

DÍA DE ROSALÍA

O pasado mércores, 23 de febreiro, data que coincide coa do seu nacemento en 1837, celebramos o Día de Rosalía no Carballal.

Fixemos un recital de poemas no recuncho de Tambo en quendas diferentes e todo o alumnado puido participar cos poemas repartidos polas aulas... e tamén cantamos!

Aquí tedes un vídeo-resumo de "Rosalía nas rías".

E aquí tedes a uns pequechos e pequechas de 3 anos do CEIPP "A Pedra" de Bueu, que no seu día, cantaron estes versos de Rosalía.

Agardamos que o gozárades tanto ou máis ca nós!!!

MINUTO DE SILENCIO POLO "VILLA DE PITANXO"

Na mañá do mércores, 16 de febreiro, realizamos un minuto de silencio na memoria dos falecidos, desaparecidos e sobrevivintes do naufraxio do buque marinense "Villa de Pitanxo", ocorrido no día de onte en augas de Terranova (Canadá).

PLAN DE MEDIACIÓN

Este mércores, 16 de febreiro, arrincou o Plan de Mediación no Carballal.

Nesta iniciativa, participa alumnado de 4º, 5º e 6º de Educación Primaria, que xa recibiu formación por parte de Paula, Orientadora do centro.

En breve comezarán a actuar, mediando nos conflitos que acontezan no colexio.

Poderedes identificalos polos seus chalecos.

LIMPOUMO (CANCIÓN E COREOGRAFÍA PARA O DESFILE DE ENTROIDO)

O Entroido está moi preto, e dende os Equipos de Dinamización da Lingua Galega, Actividades Complementarias e Extraescolares e Biblioteca, queremos deixarvos a canción coa que imos desfilar o vindeiro venres, 25 de febreiro.

Trátase dunha adaptación en galego da canción "SloMo" (Chanel) que irá a Eurovisión.

Como non nos chistaba a súa letra, decidimos parodiala, coa retranca que caracteriza a estas datas festivas, e enmarcala dentro do PDI deste curso: "Mergullo nas Rías".

Practicádea moito na casa, e a vindeira semana, faremos un casting para gravar as vosas voces, e quitar a que hai provisionalmente.

Aquí tedes a letra:

E aquí o vídeo-karaoke e a coreografía que argallaron Marta e Yasmina de 6ºA de Educación Primaria: