O pasado luns, 22 de abril, comezamos a semana con moita enerxía e música xa a primeira hora no recuncho de Tambo.
Tivemos unha sesión do programa "Lectura e Familias" para o alumnado de 5º de Educación Primaria con Nuria Naya, tía de Sara.
Nuria é a violinista do famoso grupo folk galego "Luar na Lubre", profesora de violín en Arteixo e A Coruña (especialista no Método Suzuki) e titulada superior.
Contounos un pouco da súa andaina polo mundo da música dende nena (formación, viaxes, agrupacións nas que tocou, etc) e sobre todo, o que a ela lle aporta esta disciplina artística a nivel persoal para coidar corpo e mente.
Ensinounos moitas cousas sobre o violín (partes, familia, luthiers máis famosos, técnicas, etc) e conseguimos tocar algunha nota!!!
Tamén fixo unha mini-sesión co alumnado de 6ºA de Educación Primaria pois, David Capa, tamén é o seu sobriño.
Ao remate, démoslle un pequeno agasallo e asegurounos que se volvera nacer, por moitos millóns que lle ofrecesen noutra profesión, dedicaríase á música unha vez máis!!!
Aquí tedes unha mestura con anacos dos fragmentos variados e de diferentes estilos musicais que tocou para nós.
O que máis nos gustou foi "O son do ar" (Bieito Romero - Luar na Lubre), popularizada a nivel mundial grazas a unha versión do músico Mike Oldfield ("The song of the sun") do seu disco "Voyager", publicado en 1996.
Moitas grazas pola visita, Nuria!!!
O pasado martes, 23 de abril, tivemos unha charla no recuncho de Tambo con Iria, radióloga de profesión no Hospital Provincial de Pontevedra e en Montecelo.
Estivo destinada ao alumnado de 6º de Educación Primaria dentro do programa "Inspiring girls", no que se pretende achegar o campo laboral STEM ás nenas, por medio de mulleres que lles sirvan de referencia e exemplo.
Ao rematar démoslle un fermoso agasallo de agradecemento!!!
Esa mesma mañá, celebramos o Día do Libro no colexio.
Fixemos o xa tradicional "Apadriñamento lector" no que o alumnado de 4º, 5º e 6º de Educación Primaria le contos aos cativos/as de 3º, 2º, 1º e Educación Infantil.
Foi no exterior, nun día ben solleiro e tamén aproveitamos para facer algunha manualidade relacionada con esta data nas aulas.
Aquí tedes os mellores momentos da xornada.
Tamén argallamos un libro con historias das nosas mascotas de biblioteca, Tambo e Onza, elaborado en capítulos producidos por cada aula e encadernados físicamente que moi pronto publicaremos nun dos andares do cole... aquí tedes o resultado da portada: "Mil e unha noites con Tambo".
O pasado mércores, 24 de abril, o alumnado de 6º de Educación Primaria tivo o colofón da actividade de formación sobre ciberbullying impartido pola Policía Nacional: Ciberexperto (Plan Director).
Tratouse da entrega de carnets no ximnasio e a ela asistiron autoridades como o Subdelegado do Goberno, o Xefe Provincial da Policía de Pontevedra ou o Inspector de Educación da nosa zona.
Neste acto, demos un aplauso na honra de Maite Méndez, exdirectora e Orientadora do Carballal durante moitos anos que faleceu o pasado martes...
Maite, deixou unha fonda pegada no centro, tanto no alumnado coma no profesorado, pois foi unha grande profesional do ensino e unha incansábel loitadora que defendía os dereitos das mulleres dentro do mundo do deporte.
A nosa madriña de biblioteca, Fina Casalderrey, dedicoulle estas fermosas verbas no Diario de Pontevedra...e con elas queremos despedila nós tamén pois, deixounos sen palabras.
Boa viaxe, mestra!!!
Esa mesma mañá, o alumnado de 6º de Educación Infantil, tivo un obradoiro de cociña no comedor e na aula con Mar e Albert (pizzeros en "Pizz-Bur" de O Grove).
Fixemos "nutripizzas", un alimento que non debemos comer en exceso, pero que nos serviu para clasificar os alimentos e traballar as proporcións dos mesmos nas nosas comidas por medio do "nutriplato".
Queremos agradecerlles a súa visita desinteresada pois, eles trouxeron os ingredientes.
O alumnado de 1º e 2º de Educación Primaria tamén foi a pé ao Mercado de Marín para comprar froita durante toda a mañá.
A actividade é o colofón da súa investigación sobre as froitas e hortalizas que traballaron no PDI anual, relacionada co coidado do corpo por medio da alimentación saudable.
Ao día seguinte, paparon esas froitas cunha chea de receitas ben apetecibles na Aula STEAM.
Esta iniciativa aproveitouse como actividade de paso para Educación Primaria, polo que o alumnado de 6º de Educación Infantil foi convidado.
O xoves, 25 de abril, o alumnado de 6º de Educación Primaria tivo unha saída didáctica a Santiago de Compostela durante todo o día.
Visitaron o Museo de Ciencias Naturais e recibiron información sobre os Ciclos de Formación Profesional existentes.
O venres, 26 de abril, os nenos e nenas de 1º de Educación Primaria tiveron unha nova sesión do programa "Lectura e Familias" no recuncho de Tambo.
Foi con Ainhoa, nai de Nael, que nos contou tres historias moi divertidas.
Para rematar, deixamos a coreografía de "Poesía en Silencio" para que poidades practicar na casiña.
