POESÍA NO CENTRO DE DÍA - SAÍDA Á GRANXA KIRIKO - LECTURA E FAMILIAS CON ÉRIKA E BEA - OBRADOIRO DE CIRCUÍTOS ELÉCTRICOS - INFORMACIÓN SOBRE IDENTIDADE SEXUAL - FESTA DA ESCUMA

O pasado luns, 27 de maio, tivemos unha nova saída ao Centro de Día de Marín para facer unha actividade conxunta entre dúas xeracións ben distanciadas no tempo.

Correspondeu aos axudantes de biblioteca de 5º e 6º de Educación Primaria.

Cantamos dúas cancións ao vivo acompañados coa guitarra e recitamos poemas de Rosalía de Castro vestidos con traxe tradicional.

Para rematar bailamos, fixemos xogos xuntos e merendamos... foi unha experiencia moi fermosa!!!

O mércores, 29 de maio, o alumnado de Educación Infantil tivo unha saída didáctica á Granxa Kiriko na que incluso fixeron galletas.

Pasáronno xenial en contacto coa natureza e os animais e o día non podía ser mellor en canto á meteoroloxía.

O martes e mércores, 28 e 29 de maio, tivemos a visita dunha exalumna do cole que xa cursa 4º de Enfermería e que trouxo material que empregará no seu futuro traballo.

A actividade correspondeu ao programa "Lectura e Familias".

Estivo na aula de 5ºB de Educación Primaria, pois Gabriela é a súa irmá,  explicando algúns conceptos ao alumnado sobre o sistema circulatorio e o aparato reprodutor.

Lembrou tamén vellas historias do cole de cando ela era alumna.

Moitas grazas pola visita, Érika!!!

O xoves, 30 de maio, tamén houbo unha sesión en 4º de Educación Infantil con Bea, nai de Lucas.

Ela é radióloga e falounos da súa profesión.

Auscultounos, agasallounos cun botiquín a cada un de nós e trouxo un esqueleto moi gracioso.

Démoslle un pequeno agasallo ao rematar pola súa agradable visita!!!

O profe Lucas comezou esta semana un obradoiro de circuítos eléctricos na Aula STEAM no que a rapazada debe completar retos para acender lámpadas.

Aquí temos aos nenos/as de 1º de Educación Primaria facéndoos con plastilina e explorando libremente pero, extenderáse a máis alumnado nas vindeiras semanas.

O Departamento de Orientación pendurou nova información no taboleiro dun dos andares do colexio.

Trátase de conceptos e datas relevantes sobre identidade sexual proporcionados pola Rede LGTBIQ+.

Para rematar, o pasado venres, 31 de maio, celebrouse a tradicional Festa da Escuma no exterior con ximnasia rítmica incluída.

Estivo organizada pola ANPA "Viñas Blancas" e durou toda a tardiña... pasámolo xenial!!!

ROMARÍA 21 DÍAS EN GALEGO - CONCERTO PARA UNHA MULLER SOA - ACTIVIDADE EDUCACIÓN VIARIA - PREMIO RODABALLO DE OURO NO FESTIVAL DE CINE DO MAR - SAÍDA AO CENTRO DE DÍA E MUSEO MANUEL TORRES - SAÍDA A SAN SIMÓN

O pasado venres, 24 de maio, gozamos co colofón da actividade "21 días en galego", organizada polo EDLG, que consistiu nunha romaría cunha chea de xogos, comida e bebida que puidemos conseguir canxeando os selos dos nosos cartóns.

Tamén bailamos no exterior, todos xuntos, a "Muiñeira de Raquel".

Un chisco antes, o alumnado de 6ºA de Educación Primaria, interpretou no ximnasio para o resto de nenos/as a adaptación de Eva Gutiérrez (coidadora do centro) e a profa Chus dunha obra de teatro de Luísa Villalta: "Concerto para unha muller soa".

Foi todo un éxito e notáronse ben os ensaios coa profa María Rosa!!!

Rematamos así, todas as actividades deseñadas co gallo do Día das Letras Galegas que foron adiadas por mor do mal tempo.

O mércores, 22 de maio, o alumnado de 6º de Educación Primaria tivo unha actividade sobre Educación Viaria organizada pola Policía Local.

Foi moi divertida pois, empregamos uns triciclos a modo de coches.

O xoves, 23 de maio, os nenos e nenas de 4º de Educación Primaria fixeron unha saída didáctica á illa de San Simón.

Gozaron dunha xornada solleira ben completa coñecendo a "Illa da Memoria" á que acudiron en barco.

A rapazada de Educación Infantil fixo tamén unha saída didáctica ao Centro de Día, na que cantaron e bailaron cancións tradicionais modernizadas nas versións de "Uxía Lambona e a Banda Molona".

Démoslle un detalliño aos usuarios e eles cantáronnos "A Rianxeira".

Aproveitaron tamén para visitar o Museo "Manuel Torres", onde fixeron uns fermosos debuxos.

Xa pola tardiña, tivemos a proxección na Biblioteca Pública Municipal "Landín Pazos" das pezas audiovisuais escolares do Festival "Cine do Mar" na que tiñamos catro pezas finalistas.

O sábado, 25 de maio, deuse a coñecer o fallo do xurado na gala final e acadamos o Rodaballo de Ouro, dotado con 500 euros para actividades do colexio, coa obra "Mergullo nas Rías"... moitos parabéns rapazada!!!

A Mención de Honra foi para o CEIP Sequelo co vídeo "U-los mariñeiros?" que garda unha mensaxe para reflexionar.

Un dos que máis nos gustou foi "Mareas vivas de Lourizán" do Colexio Sagrado Corazón de Placeres.