Comezamos a entrada desta semana falando dos Polos Creativos realizados durante os recreos e co alumnado de 2ºA de Educación Primaria como protagonista.
Elaboraron co profe Lucas, nada máis e nada menos, que unha fantástica guitarra eléctrica de cartón empregando circuítos... agardamos que nos ensinen moi pronto o seu son!!!
Por certo, tamén podedes escoitar o último programa de "Tambo nas Ondas" producido por estes pequenos periodistas, no que aprenderedes cousas sobre dinosaurios.
Premede na seguinte instantánea... está moi divertida a parte do esternocleidomastoideo!!!
O pasado xoves, 16 de xaneiro, recibimos a Sandra, Orientadora do IES "Mestre Landín".
Ofreceu unha charla á rapazada de 6º de Educación Primaria na biblioteca relacionada co cambio de etapa educativa pois, estes nenos e nenas, serán alumnos de Educación Secundaria Obrigatoria en poucos meses.
Aquí tedes as datas importantes para todos os que queirades matricularvos nese instituto, centro adscrito ao noso.
Por outra banda, lembramos que celebraremos dúas Xornadas de Portas Abertas os días 28 de xaneiro e 18 de febreiro en horario de tarde para todas as familias que queiran matricular aos seus fillos/as no noso centro... agardámosvos!!!
Para rematar, lembramos que en breve comezaremos co programa "21 días co galego e +".
Entre outras moitas, a actividade común que desenvolveremos, estará relacionada co videoclip "Regueifando en Marín", elaborado por alumnado do curso 2018/2019, no que se exalta a fala da nosa vila e co que poderemos aprender frases e palabras típicas de Marín.
Ide practicando que é moi probable que a cantemos todos xuntos!!!
