Boas, tambeiros/as!!!
Queremos darvos a nosa máis enérxica benvida ao cole, un chisco pasada por auga, logo dunhas merecidas vacacións de Nadal.
Comezamos o segundo trimestre cunha recomendación: a serie musical de debuxos animados "Bibopalula".
Podedes mirar a primeira temporada de balde na canle do Xabarín Club e en cada un dos seus 40 capítulos aprenderedes unha canción sinxela mergullada nunha fermosa historia de animais con moitos valores.
Aínda que está especialmente recomendada para o alumnado de Educación Infantil, é apta para todos os públicos.
E o mellor de todo... está en galego!!!
Por outra banda, lembramos que podedes visitar a nosa canle de iVoox dedicada a radio escolar: Tambo nas Ondas.
Como sabedes, este espazo educativo que axuda a desenvolver a nosa fala, prodúcese nos Polos Creativos dos recreos co profe Lucas e xa ten 7 programas feitos con alumnado de diferentes grupos de Educación Primaria.
Premede na seguinte instantánea e gozade coa maxia da radio realizada por vós mesmos!!!
Para rematar, lembramos que o vindeiro 30 de xaneiro conmemoraremos no Carballal o "Día Escolar da Non Violencia e a Paz 2025", así que... non vos esquezades de practicar a canción que interpretaremos: "Debuxando un mundo en paz".
