ENTROIDO 2025 - CLAUSURA EN COMPOSTELA DOS 21 DÍAS CO GALEGO E MÁIS - POLOS CREATIVOS - DÍA DE ROSALÍA

Esta semana festexamos o Entroido no Carballal, unha data ben sinalada no calendario escolar anual da nosa vila, Marín.

Fixemos o Mandadiño durante a semana e puidemos ver á rapazada con complementos ben graciosos.

O venres, 28 de febreiro, desfilamos pola contorna do centro con disfraces relacionados co PDI, papamos doces típicos e gozamos con algunha actuación de baile... non vos esquezades de asistir durante as vacacións ao centenario Enterro da Sardiña, tambeiros/as!!!

No 2019, traballamos esta festa... lembrades?

Aquí tedes o vídeo-resumo da xornada coa canción que compuxemos para a ocasión e que interpreta alumnado de 4º de Educación Primaria.

Na tardiña do mércores, 26 de febreiro, a ANPA "Viñas Blancas", celebrou tamén a súa tradicional Festa de Entroido con máis doces típicos, actuación por parte de Mimos e moitos disfraces.

Por outra banda, o martes, 25 de febreiro, o alumnado de 4º de Educación Primaria acudiu a Compostela para participar no Acto de Clausura dos "21 días co galego e +" durante a mañá.

Deron unha pequena entrevista para a Televisión de Galicia que podedes visualizar premendo na seguinte instantánea.

Actuaron facendo unha pequena representación e interpretación ao vivo da canción "Regueifando en Marín".

O acto rematou cantando o Himno Galego co acompañamento de gaitas e percusión tradicional.

Xa pola tardiña, logo dunha papadela nas inmediacións da Área Central, visitaron o Museo de Historia Natural da USC, no que aprenderon unha chea de cousas sobre animais e minerais.

Nos Polos Creativos da semana, o alumnado de 1ºB de Educación Primaria, continuou cos traballos de construción dunha guitarra midi co profe Lucas durante os recreos.

Para rematar, non esquezades que celebraremos o Día de Rosalía na biblioteca o vindeiro venres, 7 de marzo... tedes enigmas sobre ela polos andares do cole grazas á iniciativa "Dálle ao coco".

O lema deste ano é "Rosalía, muller viaxeira" e gozaremos con recitados e actuacións musicais relacionadas coa autora.

CLAUSURA DOS 21 DÍAS CO GALEGO E MÁIS - MANDADIÑO - CANCIÓN DE ENTROIDO (VIAXES "VIÑAS BRANCAS") - CANCIÓNS DE ROSALÍA

Esta semana, logo do Obradoiro de Elaboración de Disfraces coas familias do alumnado de Educación Primaria e da 2ª Xornada de Portas Abertas do martes, 18 de febreiro, tivemos a clausura no Carballal do programa "21 días co galego e +".

Continuamos cos xogos e obradoiros durante os recreos...

Tamén tivemos unha sesión de contacontos para o alumnado de 3º e 4º de Educación Primaria no ximnasio...

E o colofón foi o venres, 21 de febreiro, Día Internacional da Lingua Materna, coa gran festa á que asistiron autoridades como o Secretario Xeral da Lingua, o Director Xeral de Centros, o Xefe Territorial, o Conselleiro de Cultura, Lingua e Xuventude ou a Alcaldesa de Marín, María Ramallo... como non, tamén estivo Pilar Ponte, creadora desta iniciativa, e a nosa madriña de biblioteca, a Académica da RAG, Fina Casalderrey.

Miramos un vídeo-resumo dos 21 días de actividades do noso colexio e fixemos unha videoconferencia cos outros 9 centros participantes.

Tamén saímos na Radio Galega.

Asistiu alumnado do CEP "Sequelo" que interpretou unha fermosa canción a prol do galego e tivemos a actuación da "Cé Orquestra Pantasma", formada por un auténtico John Balan.

Aquí tedes o eco nos medios desta gran festa!!!

Vídeo-Resumo do Concello de Marín

Nova no Diario de Pontevedra

Logo de escoitar os discursos, presentados por alumnado de 6º de Educación Primaria a modo de regueifa, bailamos a Muíñeira de Raquel e interpretamos ao vivo o Himno Galego.

O vindeiro martes, 25 de febreiro, o alumnado de 4º de Educación Primaria, acudirá á clausura oficial en Compostela, á que asistirán representantes dos 10 centros que participaron neste programa impulsado pola Xunta de Galicia... interpretarán e escenificarán a nosa canción: "Regueifando en Marín".

Aquí tedes un ensaio!!!

E este é o vídeo-resumo da xornada!!!

Por outra banda, a semana que vén, celebraremos o Entroido no Carballal, que terá o grande desfile de disfraces o venres, 28 de febreiro.

Faremos, como xa é tradición, o Mandadiño durante a semana, que podedes ver aquí:

-Para que Entroido pareza o luns algo na cabeza.

-Se a cachola tola tes martes algo do revés.

-Para un mércores cheo de gozo trae algo no pescozo.

-Se non te dás erguido da cama trae o xoves o pixama.

-Venres imos desfilar moi ben o imos pasar!!!

O mércores, 26 de febreiro, á tardiña, será a festa da ANPA "Viñas Blancas".

Podedes ir practicando a canción que compuxemos para a ocasión, na que aparecen reflectidos todos os disfraces... dádelle caña porque gravaremos nestes días as vosas voces.

Para rematar, o domingo, 23 de febreiro, é o Día de Rosalía... coincidindo coa data na que naceu hai 188 anos.

Celebrarémolo no recuncho de Tambo un chisco máis adiante (pois cadra en domingo) pero mentres, podedes ir practicando estas dúas cancións con letra da propia Rosalía e de Manuel Curros Enríquez.

OBRADOIRO DE REGUEIFAS - CONEXIÓN CON ESTHER ESTÉVEZ - ACHÉGASE O ENTROIDO - DÍA INTERNACIONAL DA RADIO

Esta semana continuamos cunha chea de obradoiros e xogos (nos recreos e nas sesións) dentro do marco do programa "21 días co galego e +".

Unha das actividades estrela foi o mércores, 12 de febreiro, coa conexión por videoconferencia con Esther Estévez, presentadora do "Dígocho eu", na que nos contou un feixe de detalles sobre a produción dese programa viral das redes que tanto nos gusta e do que tanto aprendemos.

Fixémoslle algunhas preguntas que nos contestou amablemente... e Digochiño mandounos folgos para a derradeira etapa!!!

Se premedes na instantánea poderedes visualizar a canle de Youtube desta iniciativa.

A outra actividade destacada foi o venres, 14 de febreiro, na que o alumnado de 6º de Educacion Primaria gozou cun obradoiro de regueifas ben interesante con Lupe Blanco, no que engrasaron a súa axilidade mental grazas á improvisación musical en galego na biblioteca.

O vindeiro venres, 21 de febreiro, teremos a clausura no colexio e entre as actividades que levaremos a cabo, interpretaremos xuntos, ao vivo, o Himno Galego... non vos esquezades de practicalo.

Por outra banda, e dado que se achega o Entroido, o pasado martes, 11 de febreiro, á tardiña, tivemos un obradoiro de elaboración de disfraces para as familias do alumnado de Educacion Infantil coas súas titoras.

Semella que a cousa vai de Exipto... de didácticas viaxes!!!

Aqui podedes lembrar o desfile do curso pasado!!!

Para rematar, o pasado xoves, 13 de febreiro, festexouse o "Día Internacional da Radio".

Como sabedes, o profe Lucas botou a andar novamente a nosa radio escolar no marco dos Polos Creativos deste curso.

Non vos esquezades de visitala, pois, está anegada de divertidos podcast de "Tambo nas Ondas" elaborados polo alumnado dos diferentes niveis... premede na imaxe!!!

ACTIVIDADES DO 21 DÍAS CO GALEGO E + / CHARLA SOBRE O COIDADO DO LOMBO

Esta semana, logo da grandiosa inauguración do pasado venres, botamos a andar as actividades do programa "21 días co galego e +".

Algunhas foron propias e outras eran propostas dos 9 centros que tamén participan.

Tivemos obradoiros interesantes, como o de chapas e o de cociña; xogos (xogo da ra, bolos, carreiras de sacos, bingo, ruleta, etc), nunha semana de recreos ben divertidos en galego espallados por varios lugares do Carballal!!!

Dedicaron un día especial ao noso centro coa explicación, por parte do alumnado de 4º e 6º de Educación Primaria, do videoclip: "Regueifando en Marín".

Nesa mesma entrada do blog deste programa tan interesante, había dúas recomendacións musicais en galego de produción propia ("Autoxenreira" e "Ensalada de animais")... premede na imaxe!!!

Fixemos unha conexión en directo coa Radio Galega para falar deste programa e os representantes foron Pedro e Valentina, de 2º e 4º de Primaria respectivamente.

Podedes escoitar o podcast premendo na imaxe!!!

Xa sabedes, tambeiros/as... estendede o galego!!!

Por outra banda, rematamos anunciando que o pasado mércores, 5 de febreiro, acudiu ao centro Fátima, traballadora do Centro de Saúde de Marín con dous profesionais máis en práticas.

Doulle ao alumnado de 3º e 6º de Educación Primaria, unha charla sobre o coidado do lombo, algo ben importante se queremos estar sans e con boa mobilidade cando sexamos maiores!!!