LETRAS GALEGAS 2026 - VISITA DO "RAMÓN MENÉNDEZ PIDAL" - TEATRO - LECTURA E FAMILIAS - COCIÑA CON LOIRA - "VERSOS QUE FLORECEN" - FACENDO BARRIO

Esta semana destacou grazas ás actividades argalladas para unha das datas máis importantes do curso: o Día das Letras Galegas.

Como este ano coincidía en domingo (17 de maio), celebrámolo o venres 15 e fixémolo coincidir coa romaría (comidas + xogos) coa que culminaron os "21 días en galego" organizados polo EDLG coa colaboración da ANPA "Viñas Blancas".

 

Logo fixemos un acto dedicado á homenaxeada deste ano, Begoña Caamaño, e cantamos a sua canción favorita: o "Alalá das Mariñas" cun bis de "Aí vén o Maio" (con Gael e Xoel tocando as claves e melódica respectivamente).

Tamén recibimos a membros do claustro de mestres do Colexio "Ramón Menéndez Pidal" (Torrelavega - Cantabria) que viñeron a coñecer as dinámicas do Carballal (explicadas polo alumnado de 5º) durante o xoves e o venres no marco do programa "Observa_Acción".

Foron entrevistados xunto á Inspectora de Educación na nosa canle de radio escolar e deixáronnos escritas unhas verbas ben bonitas no libro de visitas que Tambo ten na biblio!!!

Os nenos e nenas de 1º e 2º de Educación Primaria gozaron tamén cunha obra de teatro ("A pequena osa quere xogar") na biblioteca por cortesía da Editorial Anaya.

Dentro do programa "Lectura e Familias" recibimos aos pais de Olivia de 2ºA que mostraron o show: "Cociñando contos" (Tarabelos).

Recibimos unha vez máis en 4º de Infantil ao pai de Rubén que nos ensinou a facer brochetas de salchichas e froita.

Por outra banda, o alumnado de 6ºB de Educación Primaria tivo unha actividade de cociña co seu titor, Loira.

Para finalizar, ese mesmo alumnado do 1º ciclo de Educación Primaria, tivo unha actividade común na Granxa de Briz con outros centros da nosa vila relacionada coas Letras Galegas que xa vai pola súa segunda edición: "Versos que florecen".

Nela gozaron con unha actuación de "Armadanzas" e cantaron unha canción moi marinense: "O rodaballo". 

E non esquezades que o vindeiro martes temos a festa "Facendo Barrio", tambeiros/as!!!

LECTURA E FAMILIAS - TEATRO NA BIBLIO - IRIS SOCIAL

Esta semana tivemos tres actividades no cole enmarcadas no programa "Lectura e Familias" desenvolvido polo recuncho de Tambo.

A primeira foi en 1º de Educación Primaria e nela preparamos pizza de atún co pai de Carlos na cociña.

A segunda estivo dirixida ao alumnado de 5º de Educación Infantil coa nai de Ainhoa que nos leu o conto "Antón Piñón" e deunos uns debuxos para colorear.

A terceira estivo dirixida ao mesmo alumnado e 3º de Primaria coa nai de Alexis e Adriel que nos leu un conto inventado relacionado co PDI no que os protagonistas eran os seus fillos.

Agasallounos coas imaxes do conto para levar para casa!!!

Por outra banda, os nenos e nenas de 6º de Educación Infantil interpretaron tamén na biblioteca, para o resto de alumnado cativo, a obra de teatro "A horta de Simón".

Tivo moitísimo éxito!!!

Para rematar, a rapazada de 5º de Educación Primaria, tivo unha charla con dúas persoas de "Iris Social".

Eran axentes de cambio que nos deron pequenos consellos para mudar o mundo e centráronse sobre todo na igualdade de xénero.

Déronnos uns fermosos agasallos e folletos.

APADRIÑAMENTOS LECTORES - MAIO - SAÍDAS DIDÁCTICAS - ACTIVIDADE XEOLÓXICA

Comezamos esta semana no Carballal cunha das actividades pendentes do "Día do Libro".

Trátase dos tradicionais "Apadriñamentos Lectores" no exterior do cole.

Neles, o alumnado colaborador de biblio, cóntalle contos aos máis peques das Viñas Blancas en grupos reducidos.

Celebramos tamén os Maios e fomos coller pampullo pola contorna do cole.

Pouco a pouco armamos colares e montamos o noso Maio nunha estrutura.

Finalmente, colocámoslle a coroa de gorro de cociñeiro, cantamos as coplas relacionadas co PDI e interpretamos ao vivo a mítica canción "Aí vén o Maio".

Por outra banda, tivemos dúas saídas didácticas.

A primeira foi para que o alumnado de 5º de Educación Primaria coñecera plantas da contorna de Marín coa axuda de Esther.

A segunda foi ao Café Moderno de Pontevedra por parte de todo o alumnado de Educación Infantil.

Gozaron cun obradoiro sobre reciclaxe e tiveron tempo tamén para xogar e merendar polos arredores.

Para rematar, os nenos e nenas de 4º de Educación Primaria tiveron unha charla ben interesante sobre xeoloxía (rochas) na biblioteca.

Foi con Pepote, parella da nosa administrativa Mercedes.

DÍA DO LIBRO NO CANTA ROSALÍA - LECTURA E FAMILIAS - SAÍDAS DE 6º DE PRIMARIA - AÍ VÉN O MAIO

Esta semana no Carballal destacou por unha data ben importante: o Día do Libro (23 de abril).

Aínda que as actividades destacadas serán a vindeira semana (Apadriñamentos lectores), o alumnado de 5º de Primaria festexouno en Pontevedra no concurso "Canta Rosalía".

Coñecemos un mundo de proxectos musicais doutros centros educativos que eran incribles e déronnos un agasallo individual.

Vimos ao vivo a actuación do grupo "Xeración M" cantando a famosa canción de Digochiño e pedímoslle autógrafos aos seus integrantes.

Por ser finalistas coas nosas propostas en torno á figura de Rosalía De Castro, levamos un lote de libros para a nosa biblio... o alumnado de 4º de Primaria, que temén foi finalista, non puido acudir por ter que realizar a proba de AVALIA.

Por unha banda, o alumnado de 3º de Primaria tivo dúas sesións do programa "Lectura e Familias" na cociña.

Unha foi coa nai de Pedro (froitas) e a outra co pai de Yoni (pizza e crema catalana).

Por outra banda, os nenos de 6º de Primaria tiveron dúas saídas: FP-Innova e "Festival de Cine do Mar".

Para rematar deixamos a canción de "Aí vén o Maio" que cantaremos xunto coas tradicionais coplas o vindeiro mércores, 29 de abril, para celebrar esta tradición.