O alumnado de 2º de primaria vén de recibir tres premios no Festival Escolar e Universitario das Artes Audiovisuais “eMove Festival” que conta cun xurado de prestixio internacional pertencente a compañías como: Warner Bross, Clan Tv, Discovery, Paramount ou National Geographic.
O vídeo de corte literario “As praias de Marín”, recibiu o premio á mellor reportaxe para o 1º ciclo de primaria.
Este traballo estaba baseado nunha serie de acrósticos de Eduardo Víctor Castro López.
Este traballo estaba baseado nunha serie de acrósticos de Eduardo Víctor Castro López.
A curta de stop motion “Maruxa”, recibiu o premio á mellor Curta de Animación do 1º ciclo de primaria e tamén o premio “Valores Humanos” que outorga o Humans Fest (Festival Internacional de Cine e Dereitos Humanos de Valencia).
Os traballos foron producidos durante o curso pasado cos mestres e mestras: Patricia Cacharrón, María González, Carlos Fuente, Olalla Paz e Víctor Castro.
A gala de entrega de premios foi na Cidade da Imaxe de Madrid (Kinépolis) o pasado sábado 19 de outubro e asistiron tres mestres do claustro do centro e un alumno representante: Lois Piñeiro Ucha.
Non podemos esquecer a nosa asistencia no ano 2017, na que tamén gañamos dous premios e á que asistimos un feixe de alumnos e alumnas do Carballal!!!
O venres 11 de outubro, no Teatro Principal de Compostela, celebrouse a gala "Enreguéifate", convocada polos Concellos de Teo, Ames e Santiago.
Os nenos e nenas de 5º de primaria lograron o premio á regueifa mellor cantada co videoclip "Regueifando en Marín", producido no curso pasado.
Acudiron dous mestres representantes e varios alumnos/as (Sira, Andrea, Gabriel e Izan) a recoller o recoñecemento.
A gala estivo presentada por persoeiros ben importantes como Séchu Sende e contou coa actuaciòn de García MC.
Aquí tedes un vídeo-resumo da xornada.
Para rematar esta entrada, queremos comentar que dous representantes do centro acudiron á gala do Ouff Escola de Ourense o pasado martes 1 de outubro, onde fomos finalistas con varios traballos audiovisuais producidos no curso pasado.
Non obtivemos ningún premio pero desfrutamos a escachar visualizando os proxectos gañadores.
Premendo nesta ligazón, poderedes miralos devagar.
