MARÍN REGUEIFA O MAR - LECTURA E FAMILIAS - EXCURSIÓN DE EDUCACIÓN INFANTIL - FESTA DA ESCUMA - POLOS CREATIVOS - OUTRAS NOVAS

Comezamos a entrada desta semana coa estrea da curtametraxe "Marín regueifa o mar", argallada polo alumnado de 6º de Educación Primaria e rodada por eles mesmos, que consiste nunha homenaxe á xente do mar a modo de regueifa.

Agardamos que vos guste!!!

O mércores, 27 de maio, o alumnado de 2º e 4º de Educación Primaria, tivo unha sesión ben interesante do programa "Lectura e Familias" moi relacionada coas Letras Galegas deste curso.

Visitounos Belén (nai de Carlota e Pedro) acompañada da súa amiga Begoña (pandeireteira e cantareira exmembro do grupo "Liorna").

Nela gozaron cunha exhibición de música e baile con traxe tradicional a ritmo de pandeireta.

Xa pola tarde, tivemos unha sesión de formación para familias deste mesmo programa educativo con Soledad Felloza.

Argallaron uns menús literarios ben divertidos compostos por: entrante, plato principal e postre.

Foi moi divertido e educativo e os produtos finais témolos no recuncho de Tambo.

Para despedirse agasallounos cun libro da súa autoría cunha dedicatoria ben bonita... moitas grazas por todo!!!

Por outra banda, o venres, 30 de maio, o alumnado de Educación Infantil fixo a súa excursión didáctica de fin de curso a Vilagarcía de Arousa para traballar os medios de transporte dentro do marco do PDI: "Estende as túas ás".

Foron en bus, aprenderon cousiñas sobre barcos de vela e regresaron en tren.

Nos Polos Creativos da semana, o alumnado de 6º tivo unha nova sesión de lettering e os nenos/as de 2ºA de Educación Primaria produciron este estupendo podcast na radio escolar.

Xa pola tardiña, a ANPA "Viñas Blancas" celebrou a súa tradicional festa da escuma no exterior do colexio á que acudiron unha chea de familias... o tempo acompañou!!!

Queremos lembrarvos tamén que o vindeiro sábado, 14 de xuño, os colexios da nosa vila realizarán unha nova edición da "Feira do libro usado" na Alameda Rosalía de Castro durante a mañá.

Para rematar, deixamos unha nova entrega das aventuras musicais de Tambo con: "Fuxida".

Nela ensálzase o galego e poderemos aprender o nome das praias de Marín.

Hai anos xa tratamos as praias do noso pobo con este vídeo-poema.

E mirade que fermosa curtametraxe sobre acoso escolar argallaron no colexio da Inmaculada!!!

ACROSPORT DAS LETRAS GALEGAS - XOGOS POPULARES - LECTURA E FAMILIAS CON TARABELOS - SAÍDAS DE 3º DE PRIMARIA - POLOS CREATIVOS - CHARLA SOBRE ACOSO - RODAXE

O pasado luns, 19 de maio, tivemos unha nova visita no Carballal dos usuarios/as do Centro de Día de Marín.

Traballaron os xogos populares no exterior coa rapazada de 6º de Educación Primaria, nunha fermosa sesión de achegamento entre dúas xeracións.

O profe Lucas e a profa Susi, argallaron unha exhibición de "Acrosport das Letras Galegas" no ximnasio que tamén puideron gozar os anciás.

Mirade que artistas son os nenos/as de 1º, 2º, 3º e 4º de Educación Primaria!!!

O martes, 20 de maio, tivemos unha nova sesión do programa "Lectura e Familias" na biblioteca.

Estivo destinada ao alumnado de 1º de Educación Primaria e impartírona Esteban e Ana, pais de Olivia Acuña (Tarabelos).

Nela, fixeron a súa ilustración personalizada de "A viaxe de Nele", nun caderno ben bonito.

Moitas grazas por todas as técnicas que nos ensinastes!!!

O alumnado de 3º de Educación Primaria tivo dúas saídas didácticas esta semana.

A primeira delas foi pola beira do Lérez para continuar co seu traballo de campo ecolóxico cun asesor medioambiental na mañá do martes, 20 de maio.

A segunda, foi ao Museo de Pontevedra e nela aprendemos unha chea de cousas relacionadas coa historia na mañá do xoves, 22 de maio.

Por outra banda, nos Polos Creativos da semana, o alumnado de 4ºB de Educación Primaria argallou un podcast ben divertido que podedes escoitar premendo na seguinte ligazón.

Tamén gozaron con xogos de construción e lettering.

Para rematar, o venres, 23 de maio, o alumnado de 5º de Educación Primaria, tivo unha charla na aula relacionada co acoso por parte da Policía Nacional.

Os nenos e nenas de 6º de Educación Primaria realizaron a rodaxe dunha curtametraxe ben regueifeira no porto e na praza de abastos da nosa vila que moi pronto poderedes visualizar.

Mentres, podedes aprender a canción de "Pedro Chosco", un novo personaxe que aparece na historia da tartaruga Tambo.

LETRAS GALEGAS 2025 - LECTURA E FAMILIAS - CRISTAL

O pasado venres, 16 de maio, festexamos as Letras Galegas no Carballal cunha chea de actividades relacionadas coas seis pandeireteiras homenaxeadas neste 2025: teatro dos nenos/as de 4º de Educación Primaria (coa axuda da coidadora Eva), música ao vivo (coa axuda da profa Natalia), baile tradicional (cos profes Lucas e Susi), dramatización da rapazada de 6º de Educación Primaria (coa axuda de Carmen Rodríguez de 5º de Educación Primaria) e unha actividade culinaria con produtos do mar (Food Truck).

Xa a primeira hora da mañá, o alumnado de 2º de Educación Primaria, acudiu á Alameda Rosalía de Castro para participar nun acto común organizado polos EDLG con tres colexios máis da nosa vila (A Laxe, Sequelo e O Grupo) que introduciu alumnado de 6º de Educación Primaria cunha dramatización argallada coa súa mestra Chus.

Tamén recitaron e penduraron versos en galego nas pólas das árbores coa actividade "Versos que florecen" e cantaron a canción "O rodaballo" co grupo "Fentos e Frouma", unha peza moi marinense!!!

Este tipo de poesía popular, interpretado por cantareiras, xa inspirara a Rosalía de Castro para escribir a súa obra "Cantares Gallegos".

Aquí tedes algúns recursos sobre pandeireta, baile e cante tradicional que son de moita utilidade, tambeiros/as... e uns fermosos cartaces do alumnado de 1º de Educación Primaria.

Por certo, Xabier Díaz, compositor de "Rumboia viva", mandounos unha mensaxe de felicitación pola nosa interpretación vocal!!!

E, como non, aí vai o vídeo-resumo da xornada!!!

A obra de teatro completa terédela pendurada na exposición do PDI deste curso: "Estende as túas ás".

Por outra banda, o xoves 15 de maio, o alumnado de 6º de Educación Infantil tivo unha nova sesión do programa "Lectura e Familias" no que recibiron á nai de Jara coa súa amiga Marola (mestra de chinés na Escola de Idiomas) para contarnos un conto ben fermoso dentro da aula.

A narración foi en chinés e a continuación fixérona en galego.

A temática xiraba a carón dos animais do zodíaco chinés.

Aine, irmá de Jara, tamén acudiu ao evento.

Agasalláronnos cun colgante coa forma do porco (o seu signo) e aprendemos a dicir e escribir esa palabra en chinés.

Para rematar, papamos mochis de fabas ou arandos, un postre típico de China.

Moitísimas grazas pola vosa visita!!!

Para rematar, deixamos o karaoke de "Cristal", personaxe do conto da nosa mascota Tambo que conta coa colaboración de Magín Blanco e Ángela Castro.

Bo Día das Letras Galegas teñades... cantando o Himno Galego!!!